«Шин-Лайн» кәсіпорны «Азық-түлік қауіпсіздігін қамтамасыз етудің халықаралық аспектілері» атты халықаралық семинардың алаңына айналды. Іс-шара Қазақстан Республикасы Президенті Іс басқармасы Медициналық орталығының Санитарлық-эпидемиологиялық сараптама орталығымен бірлесіп ұйымдастырылды.
Семинарға мемлекеттік қадағалау органдарының өкілдері, санитарлық қызметтер, аккредиттелген зертханалар, сондай-ақ тамақ өнеркәсібі саласының сарапшылары мен қатысушылары жиналды. Талқылау барысында азық-түлік өнімдерінің сапасын бақылаудың заманауи әдістері, санитарлық нормалардың өзектілігі және халықаралық стандарттарды ұлттық жүйеге енгізу мәселелері қозғалды.
Қатысушылар өндірістің барлық кезеңдерінде — шикізаттың қабылдануынан бастап дайын өнімді шығаруға дейін — тиімді санитарлық бақылау тетіктерін жан-жақты талқылады.
Сонымен қатар, өнімнің шығу тегін қадағалау, ластану тәуекелдерін алдын алу және НАССР қағидаттарын енгізу мәселелері кеңінен қарастырылды.
Семинардың практикалық бөлімі «Шин-Лайн» өндірістік алаңында өтті. Қонақтар компанияда енгізілген азық-түлік қауіпсіздігін басқару жүйелерімен, цифрлық шешімдермен және автоматтандырылған бақылау нүктелерімен тікелей танысу мүмкіндігіне ие болды.
Бұл семинар мемлекеттік құрылымдар мен бизнес арасындағы ашық диалог үшін маңызды алаңға айналып, тұтынушылардың сенімін арттыруға және отандық өнімдердің қауіпсіздігін жоғарылатуға ықпал етті.
